SHARE
Tlamtling lo zetih kan theihnak le thiamnak in tuahsaktu hi zo si an si. Ziangkim in zalennak a neih lo ruangah thu kan theihmi khal hi an bultan theh. Cucun khat le khat hmuhsualnak a suahter. Thudik thup asi ruangah thudik lo in kan nun zalam in hruai. Cucun awngrop lam in panpi ih pakhat le pakhat karlak ah rinhlel awk-nak, zum awk lonak a khat theh. Thutlung thufeh theih ding a um nawn lo, thuthar a um nawn lo, a thing kan ring asi bik.


Ram dang pawl cu nikhat hnu nikhat an theinak a thangso. Hmanseh kannih hrangah cun theih ding kan neih lo ruangah sanmanlo miphun ah kan cang. Beisei ding le ruahsan ding khal kan nei  nawn lo. Pakhat le pakhat kan pal bet aw. Ziangkim hi ka kut tangah um theh seh ti lungput in kan ruahnak a zel.


Diknak hmuh ding a um nawn lo, miphun, sakhua le nunphung bangaw lo hmunkhat ih in sih kawmtu daan in sullam a nei nawn lo. Pakhat le pakhat hnen ihsin zir ding a um nawn lo ruangah raal ah kan canter aw. Bulpak hrang lawng ruahnak lungput a karhter. Cucun, rampi/ miphun thansoh duhnak ai-in innsang hmasawn duhnak a hring suak.


Pakhat le pakhat karlak ah simthiam lo “um” a um theh. Leitlun thlithiang (Santi luan)  kan hip thei ve nawn lo, hrisellonak ruangih thang theilo nauhak vekah kan cang. Kan lungput a kau thei nawn lo, thazang nei lo Ar cawr vekah kan cang. Kan tumtahmi khal niamzet ah a canter asi. Cuvek rualban lo ih in tuahtu hi zo si an si.


Palap bangin thimtham lak ih rawl hawl ding men kan bang. Mei eng tuahsuak-nak ding tiva hi kan ram ah a um ve lo maw. A tuahthiamtu mitiam kan nei lo sawn. Meisa tha kan neih lo ruangah nuntu khawsak a tlamtling thei lo. Innsung sang ihsin rampi lairelnak zungpi tiang ih kan tulmi cu meisa asi.


Athat lo ruangah cun san manlo zetin thansohnak kan hawl. Meisa hi Fimzirnak ah, Zato inn ah, rampi kilhimnak ah, sumtuahnak ah le kut thiam hnatuannak ah lo theih lo ih kan tulmi asi. Culailakah a um hrih lonak a um lai. Ram thangso kan tahnak hi a phunphun in an um ko nan, a khaikhawmnak bik cu tuansuahnak in a si (A thu lawngin asi lo).


Meisa tha tel loih tuansuah theimi thaw cun thansoh ngaingai hi a harsa deuh cu a si ko. Ram sung meisa thatnak hmun pawl hi ram dang thawn thim tikah a tleu ve tiatti fangfang asi, simtlak a si hrih lo. Meisa thatlo ruangih a hngongmi pawl hi pakhat hnu pakhat kan zoh asilen a fiang aw ko ding.


Meisa a um hrih lonak hmun pawl ahcun rawlsuannak dingah thing, meihawl hrangah thinghau a tul. Lo thlawh dingah tu le tu vahhau a tul. Meikhu lakih kan tlanglen ruangah natnak kan nei tam. Van ruah a kang. Leitha kan ur kang theh. Kan ro sinsin. Dinhmun niamzet ih in rettu hi zo si an si.  

LEAVE A REPLY

Please enter your comment!
Please enter your name here