SHARE
Ziangkim ah sambaunak thawi khat cu innleng ding hmanah kan duh lo. A si, an rualpi si hman kan duh lopi. In duh lemlo khal hi an mawh lem lo. Ziangkim ih awngrop pawl cu an ruahnak (moral) tiangin a awngrop sisi. Cuvek thinlungsia, maih zawn lawng ruah duhnak lungput in neihtertu cu zo si an si. Kan suahthlak ihsin kan thiamnak le theihnak thazang hmang thei lo ding ih khuahkhirh kan si hi apoi ngaingai.


Khuahkhirhnak hnuai ih um pawl hrangah zalennak cu hahio um za ngaingai a si. Ziangkim ih phuarbeh pawl ih hlasak cu thihhnu lenglam nun a tam, lungleng beidawnnak hla an si theu. Israel pawl sal ih hruai an si lai khalah “Babylon tiva kapah kan to, zion ngai in kan tap” tiah hla an rak sak ve ngai. Kan zin a fe tuk ruangah thusau ruat theitu khal kan mal. Malte ni hmel kan vun hmuh zik detdo hmanah kan lung a awi.


Kan tha a tho, kan phur tukah kan sa bengbeng. Ar khokhuh on tak bang kan khir kan zuang. Dailoh ding tiang kan dai zik zuakzo. Zing var arcang a khuan ruang ih arpi khuan rak tumve kan bang: Rak theitupawl hrangah cun hnihsuak nak men asi ko ding. Kan tuarmi nathrik thah theinak sivai a um lo maw si.


Thicawng nungcawng ih ngawrnat tuar ringring hi a har tuk thlang lo maw. Hei ha… kut ke nei lo men bangin in ziangah in pawk beh. Ziangah ka rual le pi pawl ih zawkzet ding ih in tuah. Ziangruangah feeling men lawng in ka nun liamter in tum, feeling tama (Seihkuzin tama) vekin in hmu maw si.


Kum reipi daih, kan tul tukmi tuansuah ka duh, Ai...Ooo..lungpi dotu ding lungte a tul vekin tuih ni kan tulmi tuansuah hmaisat ka duh sawn. Ka thazang a kim sal hnuah tampi in  ka tuan vivo ding. Tuan thei lo ding le aa tuk vekah in ruat hlah. Ka kut ken na temtawnmi hi in pelh sak aw la ka tuan thei, ka tuah thei, ka hawl thei, ka ruat thei, ka thleng thei nan so khaw.


Ka u le nau ka huatnak hi ka thinlung asiat tuk ruangah asilo, amah ka hua khal asi fawn lo,  ka thin a pih tuk ruangah so khaw. An zonzaihnak an harsatnak le farah tenti te ih an umnak pawl hi ka hmuh tikah, lak hloh sak theh ka duh. Lamzin thar sialsak ka duh. Hmanseh kut le ke temton sak ka si fawn. Thei cingcingin hmu cingcingin kan zoh cuahco men asi hi, Hmm…ka thinlung le khawruahnak hi a bangtuk aw….Zan liam hlohhloh aw, khua rung vang thlang seh.  

LEAVE A REPLY

Please enter your comment!
Please enter your name here